Venier Dree
Fumetista, gràficu, vinnietista, infogràficu, illustradori, animadori, giornalistu… Nàsciu in Tolmezzo in su 1967, ANDRIA ´DREE´ VENIER est unu personàgiu creativu e prenu de ideas, chi, at sèmpiri traballau in Milanu po sotziedadis editoras importantis, s´est sèmpiri donau ita fai po torrai balimentu e po spainai sa lìngua friulana. S´est Dipromau in illustratzioni in su IED de Milanu, in is annus ´90 at traballau comenti a animadori in Mediaset, faendi animatzionis po programas e siglas de sa televisioni, a tipu ´Paperissima´. In su Friuli de su 1999 at disinniau dònnia cida is vinnietas in friulanu in su logu stòricu de «Si fâs par mût di dî» in La Vita Cattolica, e de ´97 a su ´99 at fatu su vinnietista de Avvenire. In su mundu de is fumetus at imbentau paricis personàgius chi fueddant in friulanu, a prus de is Gnognosaurs: ´Capitan Cjargne´, ´Little Meni´, ´la Acuile de Patrie´ (imperada de s´Universidadi de Ùdini po poster promotzionalis). Est unu de si fundadoris de sa fanzine in marilenghe ´Pipins´. Sèmpiri po La Vita Cattolica, at pensau su giornaleddu in lìngua friulana po pipius ´AlceCè´, aundi funt sighendi a bessiri is aventuras de is Gnognosaurs. De su 1999 est faendi is mallietas in friulanu po is de Friûlpoint (www.friulpoint.it). At tentu ideas editorialis meda, a tipu is libureddus in formau ´millelire´ chi si narànt Fregul e chi chistionànt de paricis caras de sa cultura e de sa stòria friulana, e su lìburu multimediali ´Tratôr Zâl´ (Tratori a colori de limoni), impari a su grupu musicali Beât Lès: una versioni spassiosa de ´Yellow Submarine´ de is Beatles. In su 2003, at abertu su primu blog totu in friulanu, ´Il Furlanist´. De su 2003, est giornalistu professionista. In su 2006, bessit arrespunsàbili de sa redatzioni de mensili stòricu in lìngua friulana (nàsciu in su 1947) ´La Patrie dal Friûl´, e de su 2007 benit a essi su diretori lassendi sa càrriga in su 2009, apustis de ai annoau e torrau a alleputzai su giornali. Totu custas ideas e fainas po su friulanu donant a papai? Nossi: de su 1999 est traballendi in Milanu po su Corriere della Sera. Est unu de is arrespunsàbilis de s´ofìtziu infogràfica de sa RCS Quotidiani.
